Бишкек, 28.05.26. /Кабар/. Бүгүн Бишкек шаарына Кытайдан атчан саякат жасап келе жаткан этникалык кыргыз кыздары Риза Дүйшөн кызы жана Гүлсанат Али кызы келишти.
Муниципалитеттен билдиришкендей, конокторду "Супара" этно-комплексинде Бишкек шаарынын мэринин биринчи орун басары Кубанычбек Иманалиев жана маданият, маалымат, спорт жана жаштар саясаты министринин орун басары Аскаралы Мадаминов салтанаттуу тосуп алышты.
Риза Дүйшөн кызы менен Гүлсанат Али кызы сапарын Кытайдын Кызыл-Суу Кыргыз автоном облусунан атчан башташкан. Алар Кыргызстанга "Торугарт" көзөмөл-өткөрүү пункту аркылуу кирип, андан соң Нарын жана Ысык-Көл облустары аркылуу өтүп, Бишкек шаарына келишти.
Бул саякат кыргыз элинин улуттук тамырын, тарыхый байланыштарын жана маданий биримдигин чыңдоого багытталган символикалык демилге катары каралат.
