Бишкек, 10.02.26. /Кабар/. Күн мурун Бишкекте Кыргызстандын Тышкы иштер министрлиги менен Финляндиянын Тышкы иштер министрлигинин ортосунда кезектеги саясий консультациялар өткөрүлдү.
ТИМден билдиришкендей, тараптар кыргыз-фин мамилелеринин өз ара пайдалуу жана конструктивдүү мүнөзүн белгилеп, саясий, соода-экономикалык, инвестициялык, маданий жана гуманитардык кызматташтыкты мындан ары тереңдетүүгө өз ара кызыкдар экендигин билдиришти.
Консультациялардын жүрүшүндө аймактар аралык кызматташтык маселелери, анын ичинде «Борбор Азия-Түндүк Европа (C5+N5)» диалогун өнүктүрүү маселелери да талкууланды. БУУнун, ЕККУнун жана Европа биримдигинин алкагында көп тараптуу кызматташуунун актуалдуу маселелери боюнча пикир алмашуу болду.
Гуманитардык чөйрөдө тараптар маданият, билим берүү жана илим жаатындагы кызматташтыкты өнүктүрүүнүн маанилүүлүгүн белгилешти жана генерал Карл Густав Маннергеймдин Борбор Азия, анын ичинде Кыргызстан боюнча саякаттарына арналган фотокөргөзмөнүн Бишкекте өткөрүлүшүн кубатташты.
Жолугушуунун жыйынтыгында тараптар кыргыз-фин өнөктөштүгүн андан ары чыңдоого жана үзгүлтүксүз саясий диалогду жүргүзүүгө болгон даярдыгын тастыкташты.
