Бишкек, 22.06.26. /Кабар/. Энергетика министрлиги тарифтерден түшкөн каражаттын эсебинен борбор калаанын электр инфраструктурасын кызуу жаңылоодо.
Бишкек электр тармактар ишканасынан билдиришкендей, шаардын өсүп жаткан муктаждыгын камсыздоо үчүн үч ири көмөк чордондо кубаттуулукту жогорулатуу иштери жүрүүдө:
- "Кыргызская" көмөк чордону (даярдыгы 70%): 40 МВА кубаттуулуктагы жаңы трансформатор орнотулууда. Натыйжада Бишкектин түштүк тарабын электр менен камсыздоо жакшырып, жаңы абоненттерди кошууга жол ачылат.
- "Мурас" көмөк чордону (даярдыгы 80%): Бул жерге да 40 МВА кубаттуулуктагы трансформатор коюлууда. Ал "Бишкек Арена" стадионун, "Евразия Парк" комплексин жана Мамлекеттик ипотекалык компания тарабынан курулуп жаткан жаңы турак жайларды ишенимдүү электр энергиясы менен камсыздайт.
- "Кызыл-Аскер" көмөк чордону (иштер аяктады): Эски 25 МВАлык трансформатор күчтүүрөөк 40 МВАлык жаңы жабдыкка ийгиликтүү алмаштырылды.
