Бишкек, 22.10.25./Кабар/. Бишкекте эми дизайн-код боюнча иретке келтирүүнүн экинчи этабы башталат. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, Шаар куруу жана архитектура департаментинин Бишкек шаар куруу жана архитектура башкармалыгы “Бишкек шаарынын дизайн-коду” эрежелерин ишке ашыруунун алкагында турак жайлардын фасаддарына текшерүү жүргүзүп жатат.
Дизайн-кодду ишке ашыруунун экинчи этабынын алкагында турак жай батирлеринин сырттагы кондиционер блоктору, фасаддарга жайгаштырылган интернет жана электр зымдары, өз алдынча айнектелген балкондор, уруксатсыз орнотулган кошумча конструкциялар боюнча иретке келтирүү иштери жүрөт.
Министрликтен белгилешкендей, дизайн-код боюнча интернет зымдары сыртка чыкпай иреттүү жайгаштырылып, кондиционерлер терезенин жанына орнотулушу керек. Ал эми балкондорго кошумча курулуш жүргүзүлбөшү шарт.
