Бишкек, 25.05.26 /Кабар/. Бишкек шаарында 2026-2027-жылдардын күз-кыш мезгилине даярдык көрүүнүн алкагында электр тармактарын масштабдуу модернизациялоо иштери жүрүүдө. Бул тууралуу Энергетика министрлигинен билдиришти.
Маалыматка ылайык, Бишкек электр тармактар ишканасы тарабынан пландалган бардык курулуш-монтаждоо жана оңдоо иштери үстүбүздөгү жылдын ноябрь айына чейин толугу менен бүтөт.
2026-жылы шаар боюнча 38 кошумча трансформатор жана 278 темир-бетон мамысы орнотулат. Эскирген 31 комплекттүү трансформатордук көмөк чордонунун (КТП) шкафтары заманбап үлгүгө алмаштырылат. Ошондой эле ишкананын балансындагы бардык 2 248 трансформатор жыл аягына чейин техникалык кароодон жана оңдоодон өтөт.
РЭТтер боюнча трансформаторлорду жаңылоо планы:
- Чыгыш РЭТ: 113 трансформаторду оңдоо жана 25 жаңысын орнотуу;
- Түндүк РЭТ: 85 трансформаторду оңдоо жана 10 жаңысын орнотуу;
- Батыш РЭТ: 100 трансформаторду оңдоо жана 3 жаңысын орнотуу.
"Бул иштердин аркасында шаарда электр энергиясынын жоготууларын 80%га чейин азайтуу жана электр менен камсыздоонун сапатын 90%га чейин жакшыртуу күтүлүүдө. Бул кышкы чилдеде ашыкча жүктөмдөрдү кыскартууга жана жаңы абоненттерди кошууга шарт түзөт", - деп айтылат маалыматта.
