Бишкек, 03.05.26. /Кабар/. 29-30-апрелде Токтогул Сатылганов атындагы Кыргыз улуттук филармониясында “Чексиз симфония” аттуу эл аралык музыкалык концерт өтүп, көрүүчүлөргө унутулгус маданий кече тартуулады.
Маданият министрлигинен билдиришкендей, иш-чарага биринчи айым Айгүл Жапарова, мамлекеттик катчы Арслан Койчиев, маданият, маалымат жана саясаты министринин орун басары Аскаралы Мадаминов, шаар мэри Айбек Жунушалиев, БУУнун Кыргызстандагы туруктуу координатору Антье Граве жана башка коноктор катышты.
Концерттин негизги максаты — музыка аркылуу элдерди, маданияттарды жана чыгармачылык дүйнөлөрдү бириктирүү болду.
Концертте Кыргызстандын маданиятына эмгек сиңирген ишмер, Өзбекстандын Эл артисти, дирижёр жана көркөм жетекчи Нур Өмүрбаев жетектеген Кыргыз улуттук филармониясынын эстрадалык-симфониялык оркестри менен германиялык композитор, аранжировщик жана эл аралык музыкалык долбоорлордун жетекчиси Адриан Верум жетектеген ар улуттун музыканттарынан турган "ODK Orchestra" жамааты концерттик программа тартуулашты.
Эки оркестрдин айкалышы классикалык, этникалык жана заманбап музыканы жаңы симфониялык форматта сунуштап, көрүүчүлөргө кыргыз, европа, кытай, монгол, испан, немец, орус, түрк жана башка элдердин музыкалык чыгармалары аткарылды.
Айрыкча кыргыз музыкасынын жаңы симфониялык аранжировкалары улуттук мурастын заманбап форматта жаңырышына өбөлгө түздү.
