Бишкек, 12.10.25 /Кабар/. Бүгүн борбор калаадагы Ынтымак сейил багында “Bishkek Travel Fest” аттуу жаштар туризм фестивалы өттү.
Иш-чарага Бишкек шаарынын мэри Айбек Жунушалиев, бир катар туристтик агенттиктеодин өкүлдөрү жана шаар тургундары катышты.
Мэр Айбек Жунушалиев өз сөзүндө бул фестиваль дүйнөлүк туризм күнүнө карата уюштурулганын жана ал өлкөдө алгачкы жолу белгиленип жатканын белгиледи.
“Бул жөн гана саякат майрамы эмес, бул жаңы мүмкүнчүлүктөрдүн майрамы. Мындай иш-чаралар көбөйө берсин. Жаштар активдүү катышып турсун. Майрамыңыздар менен!”, – деди ал.
Фестивалдын максаты – жаштарды туризм тармагына кызыктыруу жана алардын спорттогу жетишкендиктерин көрсөтүү аркылуу дене тарбия менен активдүү алектенүүгө үндөө.
Иш-чаранын алкагында туризм агенттиктери жана мектептердин спорттук секциялары тарабынан атайын көргөзмөлөр уюштурулду.
