Бишкек, 26.02.25. /Кабар/. Бишкекте бала бакчалар үчүн ЭТНОСТЕМ мультистудия комплектисинин таанытымы өттү. Бул тууралуу Мамлекеттик тил жана тил саясаты боюнча улуттук комиссиядан билдиришти.
Маалыматта айтылгандай, иш-чарага Бишкек шаарынын мэриясынын мамлекеттик тилди өнүктүрүү бөлүмүнүн өкүлдөрү, Билим берүү департаментинин, райондук билим берүү башкармалыктарынын жетекчилери жана бала бакчалардын директорлору катышты.
Анда долбоордун негиздөөчүсү Солдатбек Рысбек уулу ЭТНОСТЕМ мультистудия комплектисинин мүмкүнчүлүктөрүн тааныштырып, анын балдардын чыгармачылык жана интеллектуалдык өнүгүүсүнө тийгизген таасири тууралуу кеңири айтып берди.
Мамлекеттик тил жана тил саясаты боюнча улуттук комиссиясынын төрагасы Мелис Мураталиев ар бир бала бакча ушундай ЭТНОСТЕМ мультистудия комплектиси менен жабдылышы керектигин айтты.
"Улуттук баалуулуктарды заманбап билим берүү технологиялары менен айкалыштыруу аркылуу жаңы муунду кыргыз тилинде эркин сүйлөгөн, чыгармачыл жана креативдүү инсан катары тарбиялоого болот”, - деп белгиледи ал.
Иш-чаранын соңунда катышуучуларга комплексти колдонуу боюнча практикалык көрсөтмөлөр уюштурулуп, тажрыйба алмашуу мүмкүнчүлүгү түзүлдү.
Эскерте кетсек, пилоттук долбоор катары Мамлекеттик тил жана тил саясаты боюнча улуттук комиссия тарабынан Москва районунун 15 бала бакчасына ЭТНОСТЕМ мультистудия комплектиси алынып берилген. Мындай тажрыйба долбоордун натыйжалуулугун көрсөтүп, анын башка аймактарда дагы жайылтылышына өбөлгө болууда.
