Бишкек, 21.02.25. /Кабар/. Бүгүн Мамлекеттик тил жана тил саясаты боюнча улуттук комиссиянын кезектеги жыйыны өттү.
Мекемеден билдиришкендей, отурумда бир катар маселелер каралды.
Атап айтсак, кыргыз тилинин жазуу жана айтылыш эрежелерин тактоо, өркүндөтүү максатында эксперттик (жумушчу) топ түзүү сунушталды. Бул кадам тилдин грамматикалык жана лексикалык нормаларын заманбап талаптарга ылайык келтирүүгө багытталган.
Ошондой эле кыргыз тилинин жазуу тамгаларынын транслитерациясын колдонуу эрежелерин бекитүү зарылдыгы белгиленди. Бул эрежелер мамлекеттик тилдин ар түрдүү тармактарда бирдей колдонулушун камсыздоого өбөлгө түзөт.
2021-2025-жылдары ишке ашып жаткан тилди өнүктүрүү программасынын мөөнөтү аяктап жаткандыгына байланыштуу, жаңы 2026-2028-жылдарга карата мамлекеттик программаны иштеп чыгуу жана сунуштарды берүү маселеси талкууланды.
Жыйында ошондой эле күн тартибинен тышкары актуалдуу маселелер да каралды.
