Бишкек, 21.11.25. /Кабар/. Күн мурун Бишкекте Алтай шаарчасынын курулушу башталды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Курулушка президент Садыр Жапаров мезгил кутусун салып, Алтай комплекси калктын турак жайга болгон муктаждыгын жоюу жана шаардын инфратүзүмүн жаңы деңгээлге көтөрүү үчүн иштелип чыкканын белгиледи.
Алтай – бул 234 гектар аянтта жайгашкан турак жай жана социалдык комплекстин ири масштабдуу долбоору. Бул жерде 1 551 беш кабаттуу турак үй курулат. Бардыгы болуп ар кандай пландаштырылган 34 004 батир каралган. Курулуштун жалпы аянты 1 млн 7 миң чарчы метрден ашат.
Долбоорго ылайык, мектептер, бала бакчалар, поликлиникалар, ооруканалар, реабилитациялык борборлор, милиция бөлүмдөрү жана өрт-куткаруу борборлору курулат. Мындан сырткары, эс алуу үчүн аянты 50 гектар болгон чоң сейил бак, заманбап спорттук жана балдар аянтчалары каралган.
Шаарда дээрлик 86 чакырым ички жол, 50 чакырым тротуар, ошондой эле 34 500 унаага ылайыкталган унаа токтотуучу жайлар болот.
