Бишкек, 18.02.26. /Кабар/. Бишкектеги К.И. Скрябин атындагы Кыргыз улуттук агрардык университетинде "Агродиалог – 2026" айыл чарба форуму өтүүдө. Иш-чара Суу ресурстары, айыл чарба жана кайра иштетүү өнөр жайы министрлиги тарабынан уюштурулду.
Ведомстводон маалымдашкандай, форум айыл чарба тармагындагы инновацияларды жайылтуу, дыйкандардын тажрыйба алмашуусун күчөтүү жана өндүрүштүн натыйжалуулугун жогорулатуу максатын көздөйт.
Иш-чаранын алкагында 2025-жылдын жыйынтыгы менен “жеңүүчү” аталган алдыңкы дыйкан-фермерлер салтанаттуу түрдө кызыл килемден өтүшүп, коомчулукка тааныштырылды.
Айыл чарба министри Бакыт Төрөбаев тармактагы мыктыларга медалдарды жана 25 миң сомдук сертификаттарды ыйгарды. Бул сыйлыктар айыл чарба өндүрүшүндө жогорку көрсөткүчтөргө жетишкен эмгекчил дыйкандардын ийгилигин даңазалоо менен бирге, башкаларга дем берүүчү үлгү болуп саналат.
Белгилей кетсек, "Агродиалог – 2026" иш-чарасы 18-20-февраль күндөрү агрардык университетте өтүп, 21-февралда жыйынтыктоочу бөлүгү Т. Сатылганов атындагы Кыргыз улуттук филармониясында өтөт. Ага министрлер кабинетинин төрагасы Адылбек Касымалиев катышат.
