Бишкек, 03.03.26. /Кабар/. Бишкек шаарында республикалык бюджеттин эсебинен 20 мектептин курулушу башталды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, министрликте тиешелүү департаменттердин жетекчилери жана подряддык уюмдардын өкүлдөрү катышкан жумушчу жыйын өттү. Жыйында борбор калаада курулуп жаткан билим берүү мекемелеринин техникалык абалы, иштин сапаты жана аткарылуу графиги талкууланды.
Мындан тышкары, долбоорлорду ишке ашырып жаткан подряддык ишканалардын курулуш материалдары менен камсыздалышы, жумушчу күчүн уюштуруу, коопсуздук чаралары жана каржылоо маселелери каралды. Курулуш иштерин белгиленген мөөнөттөн кечиктирбөө боюнча тиешелүү тапшырмалар берилди.
Учурда объектилер райондор боюнча төмөнкүдөй бөлүштүрүлгөн:
- Октябрь району – 6 мектеп;
- Ленин району – 6 мектеп;
- Биринчи май району – 5 мектеп;
- Свердлов району – 3 мектеп.
"Бардык объектилерде курулуштун алгачкы этаптары жүрүүдө. Иштин сапаты жана коопсуздугу министрликтин тыкыр көзөмөлүндө турат", — деп айтылат маалыматта.
