Бишкек, 25.11.25. /Кабар/. Өлкөдө өтүп жаткан мамлекеттик маанидеги иш-чараларга байланыштуу Жол кыймылынын коопсуздугун камсыздоо башкы башкармалыгынын кызматкерлери Бишкек шаары жана Чүй облусунун аймагында күчөтүлгөн тартипте кызмат өтөөдө.
Ведомстводон маалымдашкандай, кызматкерлер коомдук коопсуздукту камсыздоо, жол кыймылын жөнгө салуу жана жолдордо тартипти сактоо иш-чараларын жүргүзүп жатышат.
Айрыкча чет өлкөлөрдөн келген делегаттарды тосуп алуу, аларды коштоп жүрүү жана жалпы жол коопсуздугун камсыздоо боюнча тиешелүү чаралар көрүлүүдө.
Мындан тышкары, чоң жолдордо туура эмес токтотулган унааларды алуу, мопед, самокат сыяктуу жеке мобилдүү каражаттарды жол кыймылына тоскоол болбой тургандай иретке келтирүү, жөө жүргүнчүлөргө коопсуздук эрежелерин түшүндүрүү жана чоң жолдорго чыкпоого чакыруу иштери да активдүү жүргүзүлүп жатат.
