Бишкек, 06.08.26. /Кабар/. Жалал-Абад облусунан чыккан “Биримдик кербени” Талас облусуна жетти. Бул тууралуу өкүлчүлүктөн билдиришти.
Маалыматка ылайык, “Биримдик кербени” VI Дүйнөлүк көчмөндөр оюндарынын алкагында уюштурулуп, анын катышуучулары кыргыз элинин каада-салтын, үрп-адатын жана бай маданий мурасын даңазалап келе жатышат. Алар өлкөнүн 40 районунан чогултулган булактардын суусун Ысык-Көл облусуна алып барышат.
Көчмөндөр оюндарынын алкагында өтө турган “40 уук – бир түндүк” аталышындагы салтанаттуу иш-чарада суу бир идишке бириктирилет.
Белгилей кетсек, “Биримдик кербени” 25-июлдан 2-сентябрга чейин өлкөнүн бардык аймактарын кыдырып өтөт. Долбоорго 400дөн ашуун адам катышат.
