Бишкек, 02.08.26. /Кабар/. Бүгүн, 2-августта VI Дүйнөлүк көчмөндөр оюндарынын алкагында уюштурулуп жаткан "Биримдик кербени" аттуу 40 күндүк улуттук жүрүшү Ош шаарына жетти. Бул тууралуу өкүлчүлүктөн билдиришти.
Маалыматка ылайык, ири долбоор өлкөнүн бардык аймактарын камтып, улуттук биримдикти, маданий мурастарды жана аймактар аралык ынтымакты чыңдоого багытталган.
Ноокат жана Араван районунан келген кербенди Ош шаарынын кире беришинен шаар жетекчилиги, маданият ишмерлери жана шаар тургундары салтанаттуу тосуп алышты.
Кербендин катышуучулары өлкөнүн ар кайсы аймактарынан чогултулган булак сууларын алып келишти.
Белгилей кетсек, "Биримдик кербени" 40 райондон суу чогултуп, Ысык-Көлдө өтө турган "40 уук – бир түндүк" иш-чарасында бир казанга бириктирет.
Долбоор 25-июлдан 2-сентябрга чейин уланып, ага 400дөн ашуун адам катышат.
