Бишкек, 25.06.25. /Кабар/. Беш-Арал мамлекеттик жаратылыш коругунун Ак-Шоро участогунда орнотулган фототузак жапайы жаныбарлардын сейрек учурларын тартып алган. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалыматта айтылгандай, бул сүрөттөр Кыргызстандын жаратылыш кереметтеринин бири болгон бул аймактагы биологиялык ар түрдүүлүктү сактоо жана изилдөө ишине чоң салым болуп саналат.
Ак-Шоро участогунан тартылган сүрөттөр жапайы жаратылыштын кооздугун жана аймактын фаунасынын байлыгын көрсөтүп турат. Бул — коруктун кызматкерлери тарабынан жүргүзүлүп жаткан тынымсыз эмгектин жыйынтыгы.
Маалымат үчүн: Беш-Арал мамлекеттик жаратылыш коругу 1979-жылы Чаткал өрөөнүнүн батыш бөлүгүндө жайгашкан уникалдуу жаныбарлар жана өсүмдүктөр дүйнөсүн коргоо максатында түзүлгөн. Жалпы аянты – 112 018 гектар.
Корук төмөнкү чек араларга ээ:
- Түндүктөн — Пскема тоо кыркасы аркылуу Алям ашуусунан (1990,4 м) Казан-Булак (3364,5 м), Ак-Таш (3461,4 м) жана Чоң-Таш (2238,2 м) тоолору аркылуу өтөт;
- Түштүк-чыгыштан — Терс дарыясы жана Өзбекстандын мамлекеттик чек арасы менен өтүп, эң түштүк чекити — Кара-Сай ашуусуна (3233,2 м) такалат;
- Чыгыштан — Чоң-Таш тоолору, Беш-Арал (2007,4 м) жана Катта-Күмбел (2915,1 м) ашуулары аркылуу Терс дарыясына чейин созулат.
Корук төмөнкү төрт токой чарбасынан турат:
- Кен-Булуң токой чарбасы — 34 447 га;
- Баркырак токой чарбасы — 30 661,7 га;
- Араб токой чарбасы — 21 639,3 га;
- Сандалаш токой чарбасы — 25 471,5 га.
2016-жылы Беш-Арал мамлекеттик жаратылыш коругу ЮНЕСКОнун дүйнөлүк мурастар тизмесинин алдын ала тизмесине киргизилген. Бул коруктун глобалдык экологиялык маанисин тастыктайт.
