Бишкек, 23.06.26. /Кабар/. 22-июнда Баткен районунда жүргөн катуу селдин кесепетинен Баткен электр тармактар ишканасынын имаратын жана "Баткен" көмөк чордонун суу каптады.
"Кыргызстан улуттук электр тармактары" ААКтан билдиришкендей, буга байланыштуу Баткен шаарында жана ага чектеш бир катар аймактарда электр энергиясын берүү убактылуу үзгүлтүккө учурады.
"Авариялык-оңдоо бригадалары күчөтүлгөн тартипте иштеп, аймакты тазалоо жана жабдууларды калыбына келтирүү иштерин жүргүзүүдө. Жарыкты кыска мөөнөттө берүү үчүн кошумча техникалар жана адистер тартылып, иш өзгөчө көзөмөлгө алынды", - деп айтылат маалыматта.
Белгилей кетсек, күн мурун Баткенде нөшөрлүү жаандан улам бир катар айылдарда сел жүргөн.
