Бишкек, 29.06.26. /Кабар/. Үстүбүздөгү жылдын 27-июнунда Баткен шаарында, ошондой эле Баткен жана Лейлек райондорунун аймагында болгон катуу шамалдан эки адам жабыркап, алдын ала эсептөөлөр боюнча 16 миллион сомдук зыян келтирилди.
Президенттин Баткен облусундагы өкүлчүлүгүнөн билдиришкендей, шамалдын ылдамдыгы секундасына 27-28 метрге чейин жетип, айрым турак үйлөрдүн жана социалдык объектилердин чатырларын учуруп кеткен.
Бүгүн облустун Жарандык коргонуу комиссиясынын кезектеги жыйыны өтүп, анда кырсыктын кесепеттерин жоюу маселеси каралды.
Президенттин өкүлүнүн биринчи орун басары Бактыбек Токсонбаев тиешелүү мекеме-уюмдардын жетекчилерине бир катар тапшырмаларды берди. Атап айтканда, жабыркаган жарандардан кабар алуу, социалдык объектилерди кыска мөөнөттө калыбына келтирүү жана мамлекеттик, муниципалдык объектилерди камсыздандыруу иштерин тездетүү милдеттендирилди.
Ошондой эле аймактык саламаттык сактоо кызматтарына кырсыктан жабыркаган эки жаранга зарыл болгон бардык медициналык жардамды көрсөтүү тапшырмасы берилди.
"Учурда чыгымдарды тактоо жана калыбына келтирүү иштери улантылууда", — деп айтылат маалыматта.
