Бишкек, 23.06.26. /Кабар/. Баткен электр тармактар ишканасынын кызматкерлери түнү бою селден улам үзгүлтүккө учураткан авариялык калыбына келтирүү иштерин жүргүзүштү.
"Кыргызстан улуттук электр тармактар" ААКтан билдиришкендей, ыкчам иштердин натыйжасында Баткен шаарынын жана Баткен районунун негизги бөлүгүнө электр энергиясы берилди.
"Учурда адистер Баткен шаарынын айрым бөлүктөрүн, ошондой эле Баткен районундагы Бужум, Жаңы-Жер жана Чек айылдарын электр энергиясы менен толук камсыздоо багытында иштерди улантууда", - деп айтылат маалыматта.
Ошондой эле электр жабдуулары текшерилип, селден жабыркаган объектилерде тазалоо жана калыбына келтирүү иштери жүргүзүлүүдө.
Кырдаалга байланыштуу ишкананын башкы директору Ильгиз Сыдыгалиев Баткен облусуна келип, селдин кесепеттерин жоюу жана электр энергиясын калыбына келтирүү иштеринин жүрүшү менен жеринен таанышты. Ал авариялык-калыбына келтирүү иштерине тартылган кызматкерлер менен жолугуп, иштерди ыкчам жана сапаттуу жүргүзүү боюнча тиешелүү тапшырмаларды берди.
Белгилей кетсек, күн мурун Баткенде нөшөрлүү жаандан улам бир катар айылдарда сел жүргөн. Бүгүн президенттин тапшырмасы менен селдин кесепеттерин жоюу иштери күчөтүлгөн тартипте жүрүүдө.
