Бишкек, 17.10.25. /Кабар/. Баткен облусунда "Нелегал Кордон" операциясынын алкагында Сүлүктү шаарындагы көмүр кендеринде текшерүү иштери жүргүзүлүүдө. Бул тууралуу Баткен ОИИБдин басма сөз кызматынан билдиришти.
Маалыматта белгиленгендей, 13-октябрдан 23-октябрга чейин облус аймагында “Нелегал Кордон” аталышындагы иш-чаранын алкагында Баткен ОИИБдин кызматкерлери тарабынан Сүлүктү шаарындагы көмүр казуучу кендерде иштеп жаткан чет өлкөлүктөргө карата профилактикалык түшүндүрүү иштери өтүүдө.
Анда алардын Кыргызстандын аймагында жүрүү тартиби жана эмгек ишин жүзөгө ашыруу эрежелерин сактоо боюнча эскертүүлөр берилип, мыйзам бузуулардын алдын алуу чаралары көрүлдү.
Аныкталган мыйзам бузуулар боюнча Укук бузуулар жөнүндө кодексинин негизинде тиешелүү айып салынды жана мыйзам чегинде түшүндүрүү иштери жүргүзүлгөнү белгилүү болду.
