Бишкек, 25.06.26. /Кабар/. Президенттин Баткен облусундагы өкүлү Мамыржан Рахимов кытайлык Hebei Lugang Group компаниясынын төрагасы Лю Руйляо баштаган делегацияны кабыл алды.
Өкүлчүлүктөн билдиришкендей, жолугушуунун жүрүшүндө облус башчысы Мамыржан Рахимов делегацияга Баткен облусунун инвестициялык мүмкүнчүлүктөрү, инвесторлор үчүн түзүлгөн жеңилдиктер тууралуу кеңири маалымат берип, аймакта ишке ашырууга сунушталган артыкчылыктуу долбоорлор тааныштырды.
Атап айтканда, кытайлык инвесторлорго "Достук" эл аралык соода-логистикалык паркынын долбоору, заманбап көп кабаттуу турак жайларды куруу жана курулуш материалдарын чыгаруу боюнча биргелешкен өндүрүш ишканаларын түзүү сунушталды.
Жолугушуунун жыйынтыгында тараптар өз ара кызматташуунун келечектүү багыттарын деталдуу талкуулашты. Hebei Lugang Group компаниясынын өкүлдөрү сунушталган долбоорлорго өзгөчө кызыгуусун билдирип, Баткен облусу менен тыгыз өнөктөштүктө иштешүүгө даяр экендиктерин баса белгилешти.
Маалымат үчүн: Hebei Lugang Group – логистика, транспорттук инфраструктура жана эл аралык соода багытында иш алып барган Кытайдын эң ири жана таасирдүү компанияларынын бири болуп саналат.
