Бишкек, 23.06.26. /Кабар/. Баткен облусунда селдин кесепеттерин жоюу иштери күчөтүлгөн тартипте жүрүүдө.
Президенттин аймактагы өкүлчүлүгүнөн билдиришкендей, бүгүн сел кесепеттерин жоюуга ӨКМден 100 куткаруучу, 10 техника, 4 мотопомпа, Жарандык коргонуу кызматтарынан 44 кызматкер, 12 техника, ошондой эле айыл аймактардан 9 кызматкер жана 7 техника тартылды.
Облуста жол каттамдары ачык. Учурда электр энергиясы калыбына келтирилүүдө.
Сел суусу 1 турак үйдүн ичине, 177 турак үйдүн короосуна, 17 турак үйдүн жертөлөсүнө жана 23 турак үйдүн чарбалык курулуштарына кирген. Ошондой эле 9 чакырымга жакын ички чарбалык жол бузулуп, 3 унаа жабыркаган.
Мындан тышкары, 13 электр мамысы, 10 даана лоток агып кеткен, 6 чакырым жолдун ар кайсы тилкесине кум-шагыл толгон жана 3 ички чарбалык көпүрө, 1 электр тармактар ишканасынын имараты, 1 айыл өкмөттүн короосу жабыркаган. Ошондой эле 1000 метр сел өтүүчү сайдын ичи сел калдыктарына толсо, 4000 метр сел өтүүчү сайдын ар кайсы жерлери эрозияга учураган.
Белгилей кетсек, күн мурун Баткенде нөшөрлүү жаандан улам бир катар айылдарда сел жүргөн.
