Бишкек, 02.04.26. /Кабар/. Баткен облусунун Лейлек районундагы Раззаков шаарынын Чымген айылынын тургуну Аззамкул Ташбеков күнөсканада кулпунай өстүрүп, аймактагы ийгиликтүү ишкерге айланды. Бул тууралуу президенттин облустагы өкүлчүлүгүнөн билдиришти.
Маалыматта белгиленгендей, учурда багбан кооператив мүчөлөрү менен бирге түшүм жыйноо менен алек болсо, жубайы ички базарда кулпунай сатууда.
Алардын кулпунайына суроо-талап жогору болуп, бир килограммы 1500 сомго чейин бааланууда. Ишкер кулпунайды күнөсканада эле эмес, ачык асман астында тамчылатып сугаруу ыкмасы менен да өстүрөт.
Өкүлчүлүктөн кошумчалашкандай, Аззамкул Ташбеков сыяктуу айылдын 25 тургуну бир кооперативге биригип, “Айыл чарба жана азык-түлүк коопсуздугу боюнча глобалдык программа” жана Дүйнөлүк азык-түлүк программасы тарабынан каржыланган “Азык-түлүк коопсуздугу жана тамактанууну жакшыртуу аркылуу Баткенде туруктуу азык-түлүк тутумун чыңдоо” долбоорунун алкагында колдоого ээ болуп, атайын окутуулардан өтүшкөн.
