Бишкек, 14.08.25. /Кабар/. Баткенде 25 жуптун үйлөнүү тою чоң салтанат менен өттү. Бул тууралуу президенттин аймактагы өкүлчүлүгүнөн билдиришти.
Иш-чарага жаш жубайлар жана алардын жакындары менен катар, Жогорку Кеңештин депутаты Рысбек Атажанов, президенттин Баткен облусундагы өкүлүнүн орун басары Жаныбек Исаков баштаган район-шаар жетекчилери, "Бүткүл дүйнөлүк мусулман жаштары ассамблеясынын" мүдүрү Мохаммед Мады баштаган Сауд Аравия өлкөсүнөн коноктор катышты.
Жаныбек Исаков алгач жаш жубайлардын үлпөт тоюн колдоого алган, Ахмад бин Ибрахим бин Саидге, облус башчысы Айбек Шаменовдун ыраазычылыгын билдирди.
Ошондой эле жаш жубайларга облус башчысынын куттуктоосун айтып, белектерин ыйгарды.
Аталган иш-чара президенттин Баткен облусундагы ыйгарым укуктуу өкүлүнүн аппараты, жергиликтүү бийлик органдары жана "Бүткүл дүйнөлүк мусулман жаштар ассамблеясы" коомдук бирикмеси менен биргеликте уюштурулууда.
Жубайларга бүгүн борбордук мечитте нике кыйылып, нике шакектери жана күбөлүктөрү тапшырылды. Демөөрчүлөр тарабынан үй тиричилик буюмдары да белекке берилди.
Иш-чаранын максаты-үй-бүлөлүк баалуулуктарды бекемдөө, жаштардын келечегине дем берип, коомчулукту бир максатка бириктирүү,кайрымдуулук маданиятын жайылтуу жана социалдык колдоо көрсөтүү болуп саналат.
