Бишкек, 02.06.26. /Кабар/. "Бала ырысы" программасы өмүрүнүн алгачкы жылдарында балдардын ден соолугун жана бакубаттуулугун камсыз кылууга багытталган мамлекеттик саясаттын негизги багыттарынын бири болуп саналат. Бул тууралуу Медициналык жардам көрсөтүүнү уюштуруу жана дары-дармек саясаты башкармалыгынын башкы адиси Гүлназ Ажымамбетова билдирди.
Анын айтымында, төрөлгөндөн үч жашка чейинки балдарды колдоо, эне менен баланын ден соолугун чыңдоо, ведомстволор аралык кызматташууну өнүктүрүү, кошумча колдоого муктаж үй-бүлөлөрдү ыкчам аныктоого өзгөчө көңүл бурулууда.
"Баланын өмүрүнүн биринчи жылы – ден соолукту сактоо жана ар тараптуу өнүгүү үчүн эң маанилүү мезгил. Бул учурда баланы үзгүлтүксүз көзөмөлдөө жүргүзүлөт, анын ичине эмдөө, тамактанууну жана эмчек эмизүүнү баалоо, физикалык өнүгүүсүн көзөмөлдөө, профилактикалык кароолор жана зарыл болгон скринингдик изилдөөлөр кирет", – деп баса белгиледи ал.
Ажымамбетова иштин алгоритми төрөт үйүнөн башталарын белгиледи. Ооруканадан чыккан күнү жаңы төрөлгөн ымыркай тууралуу маалымат үй-бүлөнүн жашаган жери боюнча баштапкы медициналык-санитардык жардам көрсөтүү уюмуна берилет. Кийинки милдеттүү этап – ооруканадан чыккандан кийин 7 күндүн ичинде медицина кызматкеринин үйгө барышы. Бул учурда баланы кароо жүргүзүлүп, ата-энелерге багуу, тамактануу жана өнүктүрүү маселелери боюнча кеңештер берилет.
Ал кошумчалагандай, "Бала ырысы" программасын ишке ашыруу бала төрөлгөн учурдан тартып аны коштоонун бирдиктүү санариптик багытын түзүүгө мүмкүндүк берет.
"Саламаттыкты сактоо жана социалдык коргоо тармактарын интеграциялоо үй-бүлөнү колдоого комплекстүү мамилени, тобокелдиктерди өз убагында аныктоону жана зарыл жардам көрсөтүүнү камсыз кылат. Программа – ар бир баланын ден соолугун, бакубаттуулугун жана ар тараптуу өнүгүүсүн сактоого багытталган, балдарды эрте курактан тартып коштоонун натыйжалуу системасын түзүү болуп саналат", – деп жыйынтыктады ал.
