Бишкек, 15.04.26. /Кабар/. Токмок шаарында мыйзамсыз иштеп жаткан көчмө зоопарк аныкталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, 13-апрелде адистердин катышуусунда рейд жүргүзүлүп, шаардын 3-кичи районунда жайгашкан көчмө зоопарк текшерүүгө алынган. Текшерүүнүн жыйынтыгында жапайы жаныбарларды кармоого тиешелүү уруксат берүүчү документтердин жоктугу аныкталды.
Аталган мыйзам бузуу фактысы боюнча жеринде акт түзүлдү. Жапайы жаныбарлардын мыйзамдуу келип чыгышы толук такталганга чейин, алар убактылуу кароого "Бугу эне" коомдук фондуна өткөрүлүп берилди.
Көчмө зоопарктан алынган жапайы жаныбарлардын тизмеси:
- Африка арстаны – 1;
- Карышкыр – 4;
- Канада карышкыры – 1;
- Күрөң аюу – 1;
- Маймыл (мартышка) – 1;
- Чоң үкү – 1;
- Кенгуру – 1;
- Чөө – 3;
- Эму төө кушу – 1;
- Эки өркөчтүү төө – 1;
- Кара жору – 1.
Учурда топтолгон материалдардын негизинде мыйзам чегинде чара көрүү иштери жүрүүдө.
