Бишкек, 29.01.26. /Кабар/. Акыркы 5 жылда өлкө аймагында 3 683 чакырымдан ашык жолго асфальт басылды. Бул тууралуу Транспорт жана коммуникациялар министрлигинен билдиришти.
Бул аралыкта өлкө жетекчилигинин колдоосу менен жол-транспорт тармагына казынадан каралган каражаттын көлөмү көбөйүп, ири долбоорлордун курулушу жүзөгө ашып жатат.
Акыркы 5 жылда асфальтталган жолдордун көрсөткүчү:
- 2021-жылы 175 чакырым;
- 2022-жылы 488,4 чакырым;
- 2023-жылы 673,8 чакырым;
- 2024-жылы 802 чакырым;
- 2025-жылы 1545 чакырым.
Ошондой эле жолчулардын жумушун жеңилдетүү максатында 2022-2024-жылдар аралыгында 750 атайын техника сатып алынган. Аларга самосвал, автогрейдер, битум ташыган транспорт каражаттары, бульдозер, автобетон аралаштыргыч, экскаватор жана башкалар кирет.
Жол-транспорт тармагындагы жогорку көрсөткүчтөр техникалык базанын толукталышы менен жетишилип жатат. Алынган техникалардын саны артып, аймактарга бөлүнүп берилүүдө.
