Бишкек, 17.12.25. /Кабар/. Акыйкатчы Жамиля Жаманбаева Бишкек шаарындагы №21 мекемеге (СИЗО-1) барып, андагы шарттар менен таанышты.
Акыйкатчы институтунан билдиришкендей, ал аялдар абагындагы 19 камераны кыдырып, камактагылар менен баарлашты.
Сүйлөшүү учурунда аялдар эки кызматкердин орой мамилесине жана коркутууларына даттанышып, медициналык жардамдын кечигип берилиши же такыр берилбеши боюнча нааразычылыктарын билдиришкен. Ошондой эле соттук иштердин созулушу, адвокаттардын жоктугу жана мөөнөтүнөн мурда бошотуу укуктарынын бузулушу белгиленди. Туугандары жана балдары менен жолугушуу убактысын узартуу өтүнүчтөрү берилди. Учурда СИЗОдо бир аял 1,5 жаштагы баласы менен кармалууда.
Мындан тышкары, Өзбекстан жана Россиянын жарандары экстрадициялоону тездетүү жана байланыш маселелери боюнча жардам сурашты.
Ошол эле күнү акыйкатчынын орун басары эркектер корпусун текшерди. Учурда СИЗО-1де жалпы 129 аял жана 1514 эркек кармалууда.
Акыйкатчы мекеме жетекчилигине жарандардын укуктарын камсыз кылуу жана бузууларга жол бербөө боюнча расмий сунуштарды берди.
