Бишкек, 15.05.26. /Кабар/. 15-майдан 17-майга чейин Бишкекте "Заманбап кардиохирургия – академик И.К. Ахунбаевдин мурасы" аттуу IX эл аралык илимий-практикалык конференция өтөт.
Саламаттык сактоо министрлигинен билдиришкендей, илимий конференцияга Кыргызстан, Россия, Казакстан, Өзбекстан, Сауд Аравия жана башка өлкөлөрдүн алдыңкы адистери катышат.
Анын алкагында бүгүн министр Дамир Осмонов жана орун басары Бакытбек Кадыралиев Россиянын кардиохирургия жана жүрөк-кан тамыр жаатындагы алдыңкы адистеринин делегациясы менен жолукту.
Жолугушуунун жүрүшүндө тараптар кардиохирургиялык кызматты өнүктүрүү, кесиптик кызматташууну чыңдоо, тажрыйба алмашуу, медициналык кадрларды даярдоо жана саламаттык сактоо системасына заманбап технологияларды киргизүү маселелерин талкуулашты.
Дамир Осмонов аталган конференцияны өткөрүү ата мекендик кардиохирургияны жана эл аралык кесиптик өз ара аракеттенүүнү өнүктүрүү үчүн өзгөчө мааниге ээ экенин белгиледи. Эл аралык конференция илимий жетишкендиктер менен алмашуу, актуалдуу чакырыктарды талкуулоо жана ар түрдүү өлкөлөрдүн медициналык мекемелеринин ортосундагы кызматташууну кеңейтүү үчүн маанилүү аянтча болоруна ишеним билдирди.
