Бишкек, 16.07.26. /Кабар/. Москва районундагы Ак-Суу капчыгайында заманбап курорттук-ден соолукту чыңдоо комплексинин эскиздик долбоору иштелип чыкты. Бул тууралуу Курулуш, архитектура жана турак жай-коммуналдык чарба министрлигинен билдиришти.
Долбоор аймактын туристтик потенциалын өнүктүрүү жана инвестиция тартуу максатында Москва райондук архитектура башкармалыгы тарабынан даярдалган.
Жаңы тоо курорту деңиз деңгээлинен 2 000 метр бийиктикте жайгашып, бир убакта 200 конокту кабыл алууга ылайыкташат.
"Анын курамына 3 мейманкана жана 4 апарт-отель корпусу, 9 өзүнчө коттедж жана 9 конок үйү, альпинизм борбору бар спорттук комплекс жана универсалдуу спорт залы, балдар борбору жана термалдык аймагы бар заманбап спа-борбору кирет", - деп айтылат маалыматта.
Объектти долбоорлоодо тоолуу аймактын табигый рельефи, климаттык шарттары жана курулуштун жаратылыш ландшафты менен шайкеш айкалышуусу толук эске алынган.
