Бишкек, 02.06.26. /Кабар/. Күн мурун, 1-июнда “Айылдарды комплекстүү өнүктүрүү” долбоорунун экинчи фазасын ишке ашыруу боюнча үч тараптуу өз ара түшүнүшүү жөнүндө меморандумга кол коюлду. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, документке аталган министрлик, Кореянын эл аралык кызматташтык агенттиги (KOICA) жана Good Neighbors International эл аралык уюму кол койду.
Экинчи фаза Ош, Баткен жана Жалал-Абад облустарында ишке ашырылат.
Анда фермерлерди жана кооперативдерди колдоо, инфраструктураны өнүктүрүү, логистикалык борбор куруу, микрокредитке жеткиликтүүлүктү кеңейтүү жана агрардык секторго санариптик чечимдерди киргизүү каралган.
Долбоордун биринчи этабында 2021–2025-жылдары ишке ашырылып, айыл чарба өндүрүмдүүлүгүн жогорулатуу, мал чарбачылыгын өнүктүрүү, инфраструктураны жакшыртуу жана үй-бүлөлөрдүн кирешесинин өсүшүндө олуттуу жыйынтыктарга жетишилген.
