Бишкек, 23.12.25. /Кабар/. "Кыргызавтожол-Түштүк" жана "Кыргызавтожол-Түндүк" мамлекеттик ишканалары тарабынан өлкө аймагындагы жолдорго күнү-түнү кум-туз аралашмасын себүү жумуштары аткарылууда.
Транспорт жана коммуникациялар министрлигинен билдиришкендей, жол тейлөө ишканаларынын кызматкерлери өздөрүнө бөлүнгөн аймакты толук көзөмөлгө алып, жолдорду кардан тазалоодо.
Алсак:
- Түндүк-Түштүк альтернативдик жолунун 243-296-чакырымы Арал-Казарман тилкесинде жолду кардан тазалоо жана тайгакка каршы инерттик материалдарды себүү иштери жүргүзүлдү.
- Бишкек - Нарын - Торугарт автожолунун 506-508-чакырымы Түз-Бел ашуусуна тайгакка каршы интернеттик материалдарды чачуу жана 472-537-чакырым аралыгында жол жээгин автогрейдердин жардамы менен кар күрткүдөн тазалоо иштери аткарылды.
- Кочкор-Арал-Төө-Ашуу жолун кардан тазалоо иштери жүрүүдө.
- Суусамыр -Талас -Тараз автожолун кардан тазалоо кум-туз аралашмасын чачуу иштери жүрүп жатат. Жол ачык каттам бар.
- Ала-Бука-Жаңы-Базар-Кировка, Красная-Горка-Ак-Таш унаа жолдорундагы тилкелерге инерттик материалдарды чачуу жумуштары аткарылып жатат.
- Сары-Булак-Соң-Көл жолунун 0-3,9-чакырым аралыгына кум- шагыл аралашмасын себүү иштери жүрүүдө. Жолдор ачык, каттамдар бар.
Транспорт министрлиги кандай кырдаал жаралбасын каршы тилкеге чыкпай, жол эрежесин так сактоого жана унаа дөңгөлөктөрүн кышкыга алмаштырып, керектүү шаймандарды ала жүрүүгө чакырат.
