Бишкек, 28.02.26. /Кабар/. Бишкек шаарындагы санитардык полигондун аймагында жайгашкан жаңы экотехнологиялык заводго облус башчылары, мэрлер жана акимдер үчүн таанышуу экскурсиясы уюштурулду. Бул тууралуу муниципалитеттин басма сөз кызматы билдирди.
Иш-чаранын алкагында мэрдин орун басары Рамиз Алиев катышуучуларга калдыктарды кайра иштетүү жана андан электр энергиясын алуунун заманбап технологиялары тууралуу маалымат берди.
"Долбоордун инвестиция көлөмү 95 млн долларды түзөт. Завод жылына 365 миң тоннага чейин таштандыны кайра иштетүүгө жөндөмдүү. Завод таштандыларды өрттөп жок кылуу аркылуу 30 МВт кубаттуулуктагы электр энергиясын өндүрөт. Учурда суткасына 1000 тоннага чейин таштанды иштетүүгө жөндөмдүү", - деди Алиев.
Бул Борбор Азиядагы алгачкы экотехнологиялык завод болуп саналат. Анын ишке кириши борбор калаадагы көп жылдык экологиялык көйгөйлөрдү чечүүгө жана калдыктарды башкарууну жаңы деңгээлге чыгарууга багытталган.
