Бишкек, 12.11.26 /Кабар/. Министрлер кабинетинин төрагасы Адылбек Касымалиевдин Түркиянын Анталия шаарына болгон иш сапары аяктады.
Министрлер кабинетинин төрагасы Бириккен Улуттар Уюмунун Климаттын өзгөрүшү жөнүндө алкактык конвенциясынын Тараптар конференциясынын 31-сессиясынын (COP31) алкагындагы Лидерлер саммитинин ачылыш аземине катышып, улуттук билдирүү жасады.
Адылбек Касымалиев ошондой эле “Тоо күн тартибин илгерилетүү: мөңгүлөр, криосфера жана глобалдык жылуулануу белгиленген чектен ашкан шартта туруктуулукту камсыз кылуу, жалпы жоопкерчилик жана туруктуу каржылоо” аттуу жогорку деңгээлдеги иш-чарага катышты.
Климаттык саммиттин алкагында өткөн бул кошумча иш-чараны Кыргызстан, Тажикстан, Пакистан, Бутан Падышалыгы жана Непал менен биргеликте уюштурду.
Мындан тышкары, министрлер кабинетинин төрагасы саммиттин аянтчасында уюштурулган Кыргызстандын улуттук павильонуна барды.
