Бишкек, 20.03.25. /Кабар/. Министрлер кабинетинин төрагасы Адылбек Касымалиев бир күндүк жумушчу сапары менен Чүй облусуна барды. Бул тууралуу министрлер кабинетинен билдиришти.
Анан алкагында минкаб башчысы Жайыл районунун Ак-Башат айыл аймагындагы “Чайна Петроль компани “Джунда” заводун реконструкциялоо ишинин жүрүшү менен таанышты.
Белгилүү болгондой, модернизациялоо долбоору аяктап, толук кубаттуулукка чыккандан кийин завод Кыргызстандын ички рыногунун керектөөлөрүнүн 40% дан ашыгын кайра иштетитилген мунай заттары менен камсыздайт. Продукциянын ассортиментине Аи95, Аи92, Аи80 маркасындагы бензин, дизель майы, суюлтулган газ, меш отуну, жылытуучу май жана чайыр кирет.
Минкаб башчысы Адылбек Касымалиев экологиялык талаптарды сактоо менен, буга чейинки инвестициялык макулдашууда көрсөтүлгөндөй, модернизациялоо иштерин 2025-жылдын 31-декабрына чейин толук кандуу бүткөрүүнү тапшырды.
Андан соң Адылбек Касымалиев Кара-Балта шаарындагы “Зилан Эверсун Текстиль” ЖЧКсынын ишмердүүлүгү менен таанышты. Белгилей кетсек 20 жылдан ашык убакыттан бери иштебей турган “Кара-Балта-килем” ЖЧКнын мурдагы килем фабрикасынын базасында Түркиялык инвестор тарабынан текстиль фабрикасын уюштуруу иштери башталып, президентинин ВКБ аркылуу катышуусунда завод ишке кирген.
Минкаб башчысы Адылбек Касымалиевге учурда инвестор 450 жумуш орунду ээлеген кошумча тигүү өндүрүшүн уюштуруу үчүн мурдагы оюнчук фабрикасынын аймагын жана имаратын сатып алганы туурасында маалымат берилип, бул жерде 100 орундуу аялдар жатаканасынын кошумча имаратын ачуу иштери жүргүзүлүп жатканы айтылды. Келечекте тигүү фабрикасынын кубаттуулугун 1200 жумуш орундарын түзүүдөн көбөйтүү пландаштырылууда. Бардык тигүү буюмдары экспортко чыгарылат.
