Бишкек, 04.12.25. /Кабар/. Абанын сапатын жакшыртуу максатында Бишкек шаарынын мэриясынын муниципалдык инспекциясы текшерүү иштерин улантууда.
Муниципалитеттен билдиришкендей, 2-3-декабрда инспекторлор 83 мончо менен саунаны кыдырып, тыюу салынган заттарды өрттөө фактыларын аныктоо жана алдын алуу иштерин жүргүзүштү.
Текшерүүнүн жыйынтыгында 49 мончо менен сауна катуу отун (көмүр жана отун) колдонору аныкталды, 8 объект газга же электр жылытууга өткөнү белгилүү болду, калгандары ишин токтоткон.
Орозов көчөсүндөгү 134-үйдө жайгашкан бир жеке мончо майда көмүр колдонуп жатканы аныкталды, мончонун ээсине карата протокол түзүлүп, түшүндүрүү иштери жүргүзүлдү.
Муниципалдык инспекция борбор калаанын тургундарына экологиялык эрежелерди сактоо зарылдыгын эскертип, аларды төмөнкүлөргө чакырат:
- жылытуу үчүн колдонулган май, таштанды жана башка уулуу заттарды колдонбоого;
- жалбырактарды, чөптөрдү жана тиричилик калдыктарын өрттөбөөгө;
- мүмкүн болушунча газ менен жылытууну кошкондо экологиялык жактан таза күйүүчү майларга өтүүгө.
Белгилей кетсек, Бишкек шаарынын аймагында тигүү өндүрүшүнүн калдыктарын, унаа майларын, боёк материалдарын жана пластмасса, каучук, желим, резина буюмдарын (дөңгөлөктөр, камералар жана башка) өрттөө тыюу салынат.
