Бишкек, 19.11.25. /Кабар/. Бишкекте абанын сапатын коргоо боюнча профилактикалык рейд жүргүзүлдү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, көмүр базаларын текшерүүдө сатылып жаткан көмүрдүн фракциялык курамы каралып, бөлүкчөлөрдүн өлчөмү 0–13 мм майда көмүр менен аралаш экени аныкталды.
Тактоо иштеринде аталган көмүр "Кыргыз көмүр" ААК тарабынан Кара-Кечеден майда фракцияда келип жатканы белгилүү болду. Натыйжада база ээлерине жана жооптуу адамдарына тиешелүү эскертүүлөр берилди.
Рейддик иш-чаранын алкагында жарандарга жана көмүр сатуу менен алектенген субъекттерге абанын сапатын жакшыртуу, атмосферага булгануучу заттардын чыгышын азайтуу жана тиешелүү эрежелерди сактоо боюнча түшүндүрүү иштери жүргүзүлдү.
