Бишкек, 15.06.26. /Кабар/. Президенттин Жалал-Абад облусундагы өкүлү Тилек Текебаев Аксы районунда курулуп жаткан Ак-Терек каналынын курулуш иштери менен таанышты.
Өкүлчүлүктөн билдиришкендей, бул маселе буга чейин өткөн элдик жыйында жергиликтүү тургундар тарабынан көтөрүлгөн.
Падыша-Ата дарыясынан башталган бул ири ирригациялык объект Аксыдагы сугат суу тартыштыгын биротоло жоюуга багытталган. Долбоордун жалпы наркы 908,2 млн сомду түзөт. Канал толук бүткөндөн кийин 3400 гектар жаңы жер аянты өздөштүрүлүп, сугат суу менен камсыз болот.
Канал секундасына 8 куб метр суу өткөрө алат. Долбоордун алкагында суу тосмо курулмасы, 2 чакырымдан ашык башкы канал жана узундугу 2 чакырым 44 метр болгон атайын туннель курулууда.
Азыркы тапта туннелди казып бүтүүгө болгону 215 метр калды. Жумуш эки нөөмөт менен үзгүлтүксүз жүрүп жатат. Адистердин билдиришинче, туннелди казуу иштери үстүбүздөгү жылдын август айында толук аяктап, андан соң бетондоо этабы башталат.
Облус башчысы тиешелүү жетекчилерге курулуштун сапатын катуу көзөмөлгө алууну жана жумуштарды өз убагында бүтүрүүнү тапшырды.
