Бишкек, 21.05.26 /Кабар/. Мамлекеттик катчы Арслан Койчиевдин төрагалыгы алдында бүгүн, 21-майда юбилейлик Ысык-Көл эл аралык форумун даярдоо жана өткөрүү боюнча уюштуруу комитетинин кезектеги жыйыны өттү.
Жыйындын жүрүшүндө катышуучулар форумдун жалпы концепциясы, анын аталышы жана талкуулоо темалары заман талабындагы дүйнөлүк тенденцияларга жана актуалдуу чакырыктарга шайкеш келиши керектигин белгилешти, ошондой эле иш-чаранын мазмундук деңгээлин мындан ары жогорулатууга багытталган бир катар сунуштар ортого салынды.
Юбилейлик форумга дүйнөгө белгилүү окумуштуулар, Нобель сыйлыгынын лауреаттары, илимий ишмерлер, белгилүү акындар жана жазуучулар, дүйнөнүн 20дан ашуун өлкөсүнөн келген мамлекеттик жана коомдук ишмерлер катышары күтүлүүдө.
Жыйынтыгында Арслан Койчиев форумдун өтүү мөөнөтү жакындап калганына токтолуп, бекитилген иш-чаралар планынын алкагында бардык тиешелүү мамлекеттик органдар жана жооптуу түзүмдөр тарабынан системалуу жана ыкчам иш алып баруу зарылдыгын баса белгиледи.
