Бишкек, 23.06.26. /Кабар/. Президенттин Баткен облусундагы өкүлү Мамыржан Рахимов Эл аралык миграция уюмунун Кыргызстандагы жана Казакстандагы өкүлдөрү менен жолукту.
Өкүлчүлүктөн билдиришкендей, уюмдун Казакстандагы өкүлчүлүгүнүн делегациясы Баткенде Улуу Британиядан кайткан эмгек мигранттарынын ишкердик демилгелерин колдоо долбоорунун жыйынтыгы менен жеринде таанышууда.
2023-2025-жылдары "1+1" механизми аркылуу мекенге кайткан 59 жарандын бизнес-планы каржыланган, анын 39у Баткендин тургундары.
Ишке ашкан демилгелердин алкагында аймактарда 100дөн ашык жаңы жумуш орду түзүлдү. Аталган уюм тарабынан гранттык каржылоо 18,4 млн сомдон ашса, ишкерлердин өздүк салымы 17 млн сомду түзгөн.
"Азыркы тапта долбоорго катышкан айылдык ишкерлердин айлык кирешеси 60 миң сомдон 1 млн сомго чейин жетүүдө", - деп айтылат маалыматта.
Белгиленгендей, аталган программанын алкагында Баткен аймагында айыл чарбасы, тигүү өндүрүшү, курулуш материалдарын жана газоблок чыгаруу, сүт азыктарын кайра иштетүү сыяктуу түрдүү багыттагы чакан ишканалар ийгиликтүү иш баштаган. Эл аралык өкүлдөр бул тажрыйба аймактын социалдык-экономикалык натыйжалуулугун көтөрүүдө үлгүлүү экенин белгилешти.
