Бишкек, 20.01.26 /Кабар/. Бишкекте дагы бир курулуш компаниясына 200 миң сом айып пул салынды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, мындай чечим министр Нурдан Орунтаевдин инспекторлор менен биргеликте бир катар курулуш объектилерине жүргүзгөн рейдинен кийин кабыл алынган.
Текшерүүдө Т.Океев көчөсү, 9 жана 11 даректеринде курулуп жаткан 5 кабаттуу окуу борборунун курулушунда курулуш ченемдеринин жана талаптарынын сакталбагандыгы аныкталды.
Натыйжада курулуш иштерин жүргүзгөн "Бина Групп" ЖЧКсына карата протокол түзүлүп, 200 миң сом өлчөмүндө айып пул салынды.
Ошондой эле көрсөтүлгөн кемчиликтерди жоюу боюнча жазуу түрүндө эскертүү берилди.
