Бишкек, 16.06.26. /Кабар/. "Ала-Тоо Резорт" тоо-лыжа курортунда башкы суу алуучу курулма жана ичүүчү суу сактоочу резервуарлардын курулуш иштери кызуу жүрүүдө. Бул тууралуу Курулуш, архитектура жана турак жай-коммуналдык чарба министрлигинен билдиришти.
Бүгүн министр Нурдан Орунтаев курулуш иштеринин жүрүшү менен таанышты. Долбоор курорттук аймакты үзгүлтүксүз ичүүчү суу менен камсыздоого багытталган маанилүү инфраструктуралык объект болуп саналат.
Учурда башкы суу алуучу курулмада иштердин 60 пайызы, ички суу түтүк тармактарында 50 пайызы аткарылган. Ошондой эле төрт суу сактоочу резервуардын курулушунда жер казуу иштери аяктап, суу тазалоочу станциянын фундаменттери курулган.
Аймактын тоолуу шарттарына байланыштуу курулуш иштеринин айрым этаптары убактылуу токтотулган. Азыркы учурда курулуш техникасын жана материалдарды мобилизациялоо, ошондой эле объектти электр энергиясы менен камсыздоо боюнча даярдык иштери жүргүзүлүүдө.
Орунтаев курулуш иштеринин сапатын камсыз кылуу, белгиленген мөөнөттөрдү сактоо жана объектти өз убагында пайдаланууга берүү боюнча тиешелүү тапшырмаларды берди.
Белгилей кетсек, бүгүнкү күндө объект боюнча курулуш-монтаж иштеринин жалпы аткарылышы 30 пайызды түзөт.
