Бишкек, 25.04.26. /Кабар/. Ак-Суу районундагы "Жыргалаң" лыжа курортунун аймагында ишембилик өткөрүлүп, ийне жалбырактуу дарактардын көчөттөрү отургузулду. Бул тууралуу "Ала-Тоо Резорт" ААКтан билдиришти.
Маалыматка ылайык, иш-чаранын жүрүшүндө курорттун аймагындагы 3,5 гектар жер жашылдандырылып, жалпы 3000 даана ийне жалбырактуу дарактын көчөтү отургузулду.
Демилгенин негизги максаты - жаратылышты сактоо, аймактын экосистемасын калыбына келтирүү жана экологиялык абалды жакшыртуу болуп саналат.
Аталган иш-чара "Жашыл мурас" улуттук кампаниясынын алкагында өткөрүлүп, өлкө боюнча жашыл аймактарды кеңейтүүгө, токой фондун көбөйтүүгө жана климаттын өзгөрүшүнүн терс таасирин азайтууга багытталган жалпы республикалык аракеттердин бир бөлүгү болуп эсептелет.
