Жыл башынан бери Мамлекеттик камсыздандыруу уюму (МКУ) турак жайды милдеттүү камсыздандыруу программасынын алкагында 26 млн 827 миң 51 сом төлөп берди. Бул тууралуу "Кабар" маалымат агенттигине уюмдун басма сөз кызматынан билдиришти.
Маалыматка ылайык, өрттөн, суу ташкынынан, катуу шамалдан жана башка табигый кырсыктардан жабыркаган 217 жаран кенемте алган.
Белгилей кетсек, эң көп кайрылуулар өрткө байланыштуу болгон, 126 адам өрттөн жабыркап, аларга 23 млн 845 миң 424 сом кенемте берилген.
Калган каражаттар табигый кырсыктар - сел, бороон-чапкын жана башка өзгөчө кырдаалдардан кийин бөлүнгөн.
Камсыздандыруу төлөмдөрү жарандарга жабыркаган үйлөрдү калыбына келтирүүгө, оңдоп-түзөөгө же жаңы турак жай курууга жардам берет.
Канат Кулматовдун окуясы
Буга Бишкек шаарынын Ленин районундагы окуя ачык мисал боло алат, анда тургун Канат Кулматов 450 миң сом өлчөмүндө камсыздандыруу кенемтесин алган. Ага райондун башчысы Тариел Айтиев сертификат тапшырган.
Кулматовдун үйү болгону 1200 сомго камсыздандырылган, ал эми өрт чыкканда камсыздандыруунун жардамы тийди.
Райондук администрациядан белгилешкендей, бул окуя өз убагында камсыздандыруунун маанилүүлүгүн ачык тастыктады. Бул жөнөкөй жана жеткиликтүү чара үй-бүлөнү жана мүлктү күтүлбөгөн жагдайлардан коргоого жардам берет.
Камсыздандыруу жөн гана формалдуулук эмес, кыйын мезгилде жарандарды колдоонун чыныгы куралы.
Эмне үчүн камсыздандыруу керек?
Адистер эскертишкендей, милдеттүү түрдө үйдү камсыздандыруу Кыргызстанда күчүндө жана турак жай имараттарын, батирлерди жана чарбалык курулуштарды камтыйт. Камсыздандыруунун минималдуу төлөмү жылына болгону 1200 сомду түзөт, ал эми өзгөчө кырдаал болгон учурда жарандар он, ал тургай жүз эсе көп кенемте алат.
Мамлекеттик камсыздандыруу уюмунун өкүлдөрү сунуштагандай, айрыкча кыш мезгилине чейин өрт жана катуу жаан-чачын коркунучу жогорулаганда камсыздандыруу алууну кечиктирбөө зарыл. Ошондой эле уюмдан белгилешкендей, өз убагында камсыздандыруу жөн гана мыйзамдуу талап эмес, жеке коопсуздугуна жана үй-бүлөнүн каржылык туруктуулугуна карай маанилүү кадамы болуп саналат.
