Бишкек, 22.09.25. /Кабар/.Токтогул Сатылганов атындагы Кыргыз улуттук филармониясында Мамлекеттик тил күнүнө арналган салтанаттуу иш-чара болуп өттү.
Муниципалитеттен билдиришкендей, иш-чараны Бишкек шаарынын мэриясы уюштуруп, ага мэр Айбек Жунушалиев, Бишкек шаардык кеңешинин төрагасынын орун басары Жылдызбек Абдраимов, Улуттук комиссиянын төрагасы Мелис Мураталиев, Республикалык «Кыргыз тили» коомунун президенти Раимжан Курбанов жана башка жетекчилер, кызматкерлер, шаар тургундары, мугалимдер катышты.
Майрамдык салтанатта мэр Айбек Жунушалиев сөз сүйлөп, кыргыз тилинин тарыхына жана келечегине токтолду.
«Кыргыз тили ааламда теңдеши жок “Манас” эпосун түзгөн дүйнөдөгү эң байыркы тилдердин бири. Мамлекеттик тилди колдоо жана өнүктүрүү – өлкөбүздүн келечегине болгон инвестиция», – деди ал.
Мамлекеттик тил күнүнүн алкагында муниципалитеттин түзүмдүк жана аймактык башкармалыктарынын кызматкерлери кыргыз тилин өнүктүрүүгө кошкон салымы үчүн Ардак грамота жана ыраазычылык баракчалары менен сыйланышты. Ошондой эле Мамлекеттик тил боюнча улуттук комиссия да өз сыйлыктарын тапшырды.
Салтанаттын маданий бөлүгү абдан бай болду. «Кыргыз руху» фольклордук ансамбли, Бишкек шаарынын мэриясынын эл аспаптар оркестри жана белгилүү аткаруучулар концерттик программа тартуулашты. Алар музыкалык жана поэтикалык чыгармалары менен көрүүчүлөргө кыргыз маданиятынын байлыгын жана өзгөчөлүгүн көрсөтө алышты.
Иш-чаранын соңунда кыргыз тилин мындан ары өнүктүрүү, жаштар арасында жайылтуу жана көп улуттуу өлкөдө улуттук биримдиктин символу катары бекемдөө боюнча маанилүү демилгелер талкууланды.
