Бишкек, 17.04.25. /Кабар/. Бүгүн Бишкекте Жогорку соттун мурдагы төрагасы, эмгек сиңирген юрист Мамадияр Исабаевди акыркы сапарга узатуу зыйнаты өттү. Бул тууралуу Жогорку соттон билдиришти.
Коштошуу зыйнатына Жогорку соттун төрагасынын орун басары Нурлан Мусаев, көрүнүктүү мамлекеттик жана коомдук ишмерлер, сот тутумунун өкүлдөрү жана ардагерлер, туугандары, жакындары жана кесиптештери катышты.
“Бүгүн биз терең кайгыруу менен улууга урмат, кичүүгө сый мамилеси, үлгүлүү жүрүм-туруму менен эл оозуна алынган, антына бек, асыл агабызды жана кесиптешибизди акыркы сапарга узатып жатабыз.
"Жолборс изинен, баатыр сөзүнөн кайтпайт" демекчи, Мамадияр Исламовичтин айткан сөзү менен жасаган иши дайыма дал келчү эле.
Ал көптөгөн улуу-аруу касиеттерди өзүнө камтыган, кара кылды как жарган, мыйзамдуулук үчүн күрөшкөн, акыйкатты туу кармаган, дили таза, өзүнүн принципиалдуу позициясы бар тажрыйбалуу судья жана жөнөкөй адам катары кесиптештеринин эсинде калат.
Жалпы кыргыз элинин арасында кадыр-баркка ээ болуп, өзүнүн жогорку инсандык жана профессионалдык сапаттарынан улам сот бийлигинин эң жогорку кызматы - Жогорку соттун төрагасынын кызматына көрсөтүлүп, аны 1995-1998- жылдары үзүрлүү жана ийгиликтүү аркалаган.
Сот системасына эмгеги сиңген үчүн көптөгөн мамлекеттик жана ведомстволук сыйлыктарга ээ болуп, маанилүү, маңыздүү өмүр сүрүп, аркасынан айтарга жакшы сөз, жакшы из калтыра алды”, — деп белгиледи Нурлан Мусаев.
Мамадияр Исабаевдин сөөгү Бишкек шаарындагы "Ала-Арча" мамлекеттик көрүстөнүнө коюлду.
