Бишкек, 10.07.26 /Кабар/. Ош шаарынын мэри Жанарбек Акаев шаардагы экинчи жаңы мейкиндик — "Жаштардын креативдүү хабына" барып, түзүлгөн шарттар менен таанышты.
Муниципалитеттен билдиришкендей, мэр жаштардын жаңы идеяларын жана демилгелерин колдоо иретинде борборго 100 миң сомдук акчалай сыйлык тапшырды.
"Биз жаштар билим алып, өз идеяларын ишке ашыруусу үчүн бардык шарттарды түзөбүз. Азыр жасалма интеллект, санариптик технологиялар жана чыгармачыл индустриялар заман талабы болуп калды. Оштун жаштары бул өзгөрүүлөрдөн артта калбашы керек", - деди Акаев.
"Жаштардын креативдүү хабында" иштөө, билим алуу, жолугушууларды өткөрүү жана эс алуу үчүн бардык шарттар каралган.
Ошондой эле борбор жайгашкан Молдо Нияз көчөсү толук оңдолуп, асфальт төшөлдү.
Эскерте кетсек, буга чейин Ош шаарында тил үйрөтүү, шахмат, кулинария курстары жана заманбап конференция залдары камтылган үч кабаттуу алгачкы Жаштар борбору колдонууга берилген.
