Бишкек, 29.05.26. /Кабар/. Жети-Өгүз районунун Ак-Кочкор айылында 150 орундуу заманбап мектеп курулду.
Курулуш министрлигинен билдиришкендей, объекттин курулушу республикалык бюджеттен каржыланып, жалпы наркы 87 миллион сомду түздү.
Долбоорго ылайык, жалпы аянты 1358 чарчы метрди түзгөн эки кабаттуу окуу корпусу жана спорт зал салынды. Мектепте заманбап окуу класстары, лаборатория, китепкана, ашкана, азык-түлүк сактоочу кампа жана жыйындар залы каралган.
Мектеп пайдаланууга берилгенден кийин эки нөөмөттө 300дөн ашык окуучу билим алат.
