Бишкек, 25.02.26. /Кабар/. Агартуу министрлиги ата-энелердин жана окуучулардын суранычтарын эске алуу менен жазгы каникулду узартуу чечимин кабыл алды. Жаңы чечимге ылайык, эс алуу мезгили 2-марттан 7-мартка чейин созулат. Бул мурунку графикке (6-8-март) салыштырмалуу 4 күнгө көп.
Ведомстводон белгилешкендей, ошондой эле эс алуу күндөрүнүн көбөйгөнүнө байланыштуу 4 окуу күнү май айында толукталат. Ал эми 2025-2026-окуу жылынын аякташы 25-майдан 29-майга жылдырылды. Салтанаттуу Акыркы коңгуроо иш-чарасы 29-майда өтөт.
Эмне үчүн каникулду узартуу балдар үчүн маанилүү?
Психолог Айжамал Исамидинова мектеп окуучулары үчүн кошумча эс алуунун маанилүүлүгү тууралуу "Кабар" агенттигине айтып берди.
Анын айтымында, узартылган каникул кошумча мотивация гана болбостон, өзгөчө чыңалган окуу мезгилинен кийин күч-кубатты калыбына келтирүү үчүн зарыл ресурс болуп саналат. Кыска тыныгуулар көбүнчө балдардын толук кандуу эс алуусуна мүмкүндүк бербейт. Ал эми топтолуп калган стресс жана чарчоо окууга болгон кызыгуусуна жана эмоционалдык абалына терс таасирин тийгизиши мүмкүн.
"Каникулдун узартылышы үй-бүлө менен баарлашууга жана активдүү эс алууга шарт түзөт, бул балдардын психоэмоционалдык өнүгүүсү үчүн өтө маанилүү. Кошумча күндөр окуучулардын тынчсыздануусун жана стрессин азайтууга, эмоционалдык саламаттыгын чыңдоого жана окууга кайтып келгенде кунт коюусун жогорулатууга мүмкүндүк берет", — деп белгиледи адис.
Айжамал Исамидинова ошондой эле Акыркы коңгуроо күнүн 29-майга жылдыруу окуучуларга салтанатка даярдануу үчүн көбүрөөк убакыт берерин жана майрамды жакшы уюштурууга шарт түзөрүн, ошондой эле экзамен алдындагы стрессти азайтарын белгиледи.
Калтырылган окуу күндөрү кантип толтурулат?
Агартуу министрлиги калтырылган күндөр май айындагы окуу планына киргизилерин, бул 2025-2026-окуу жылынын программасын толук аяктоого мүмкүндүк берерин тактады. Ошентип, билим берүү процессине зыян келбейт, ал эми мектеп окуучулары жетишкендиктерине терс таасирин тийгизбестен, кошумча эс алуу күндөрүн алышат.
Жазгы каникулдун узартылышы билим берүү системасы академиялык көрсөткүчтөрдү гана эмес, балдардын психоэмоционалдык абалын, ошондой эле окуучуларды, ата-энелерди жана педагогдорду бириктирген символикалык окуялардын маанилүүлүгүн да эске аларын көрсөтүп турат.
