Бишкек 13.06.25 /Кабар/. Бүгүн, 13-июнда “Кабар” улуттук маалымат агенттигинин имаратынын капиталдык оңдоп-түзөөдөн кийинки ачылышынын алкагында агенттикке ЖМК башчылары, ведомстволордун маалымат катчылары, журналисттер, эксперттер чакырылды.
Конокторду салтанаттуу түрдө тосуп алган агенттиктин директору Медербек Шерметалиев мекеменин тарыхына, анын мамлекеттин маалыматтык саясатын жүргүзүүдөгү маанисине токтолуп, жаңыланган имаратта кызматкерлерге ыңгайлуу шарттар түзүлгөнүн белгиледи.
“Эскилиги жеткен имараттын жаңыланышы, материалдык-техникалык базанын чыңдалышы жана кызматкерлердин эмгек акысынын жогорулашы агенттиктин чыгармачыл жамаатына зор дем берип, алардын ишке болгон кызыгуусун арттырды. Бул өзгөрүүлөр “Кабар” агенттигинин ишмердигин жаңы деңгээлге чыгарууга өбөлгө түздү. Мындай колдоо жана шарттар үчүн агенттиктин жалпы жамааты президент Садыр Жапаровго жана президенттин Иш башкармалыгына терең ыраазычылык билдирет”,-деди
Андан соң чакырылган коноктор жаңыланган имарат менен таанышып чыгышты.
Маалымат үчүн: Кыргыз улуттук “Кабар” маалымат агенттиги 1937-жылы “КирТаг” деген аталыш менен негизделген жана Кыргызстандын эң алгачкы маалымат агенттиги.
Бул өлкөнүн ички жана эл аралык маалыматтык саясатын координациялоочу жалгыз мамлекеттик маалымат ресурсу. Агенттиктин жаңылыктары кыргыз, орус, англис, араб, түрк жана кытай тилдеринде жарыяланып турат.
Агенттик чет мамлекеттер менен маалыматтык жана башка иш чөйрөлөрдө эл аралык жана тышкы экономикалык байланыштарды ишке ашырат. Учурда агенттиктин КМШнын бардык өлкөлөрү, дүйнөнүн бир катар белгилүү маалымат агенттиктери – Синьхуа, CNA (Кытай), Kyodo, YonHap, QNA (Катар) жана башкалар менен маалымат алмашуу боюнча келишимдери бар.
Агенттикте мамлекеттик органдардын, эл аралык уюмдардын, бизнес-коомчулуктардын, коомдук бирикмелердин жетекчилери жана өкүлдөрү менен маалымат жыйындары да өткөрүлүп турат.
